බංගලාදේශය පරාජය කල ශ්‍රී ලංකාව පළමු තරඟය ජයගනී..

0
126

“Red Bull විශ්ව විද්‍යාල ක්‍රිකට් තරගාවලියේ” ලෝක මට්ටමේ අවසන් තරගාවලිය අද (10) ආරම්භ වූ අතර, එහි දී ශ්‍රී ලංකා කණ්ඩායම සහභාගි වූ පළමු තරගයෙන් බංග්ලාදේශය පරාජය කරමින් ලකුණු 47ක ජයග්‍රහණයක් ලබා ගැනීමට සමත් විය.

කොළඹ කෝල්ට්ස් පිටියේ දී පැවැත්වූ මෙම තරගයේ දී කාසියේ වාසිය ජයග්‍රහණය කළ බංග්ලාදේශ කණ්ඩායම පළමුව පන්දු යැවීමට තීරණය කරන ලදි.

ගේශාන් විමලධර්ම හා හශාන් දුමිඳු ශ්‍රී ලංකා කණ්ඩායම වෙනුවෙන් පළමුව පිටියට පිවිසි අතර, ඔවුන්ට පළමු කඩුල්ල සඳහා ගොඩනැංවීමට හැකි වූයේ ලකුණු 8ක සබඳතාවයක් පමණි. ලකුණු 25කට කඩුලු 2ක් දැවී තිබූ අවස්ථාවේ දී පිටියට අවතීර්ණ වූ මනෝජ් සරත්චන්ද්‍ර සමඟින් එක්වූ දුමිඳු, ලකුණු 25ක සබඳතාවයක් ගොඩනංවන ලදි.

පන්දු 9ක දී ලකුණු 15ක් ලබාගෙන සිටි මනෝජ්ගේ දැවී යාමට පසුව ශ්‍රී ලංකා පිතිකරණ ලැයිස්තුවේ කතානායකයා බඳු වූ ජනිත ලියනගේ ගේ ඉනිම බංග්ලාදේශ පන්දු යවන්නන් ඉදිරියේ දිග හැරෙන්නට විය. එහි දී වේගවත් හා දක්ෂ පිතිකරණයක නිරත වූ ජනිත පන්දු 33ක් පමණක් වැය කරමින් 4 පහර 3ක් හා එක් 6 පහරක් සමඟින් ලකුණු 40ක් රැස්කර ගන්නා ලදි. ඔහුට සහය වුන දුමිඳු එක් 6 පහරක් හා එක් 4 පහරක් සමඟින් ලකුණු 17ක් ලබාගෙන සිටිය දී නහිදුල් ඉස්ලාම්ගේ පන්දුවකට දැවී යන ලදි.

ඔවුන් දෙදෙනාගේ ද දැවී යාම්වලට පසුව එක් මොහොතක දී ශ්‍රී ලංකා ඉනිම ඉතාමත් අසීරු මට්ටමක පැවතියේ, ලකුණු 124කට කඩුලු 7ක් ලෙස ලකුණු පුවරුව දිස්වෙමිනි. පසුව 8 වැනි කඩුල්ල සඳහා ජවසම්පන්න සබඳතාවයක් ගොඩනැංවීමට කටයුතු කළ චාමික කරුණාරත්න හා කේ. ජයවික්‍රම, ශ්‍රී ලංකා ඉනිම ලකුණු 188ක් දක්වා ඔසවා තැබුවේ ලකුණු 64ක සාර්ථක හා නොබිදුනු සබඳතාවයක් ද ගොඩනංවමිනි.

පන්දු යැවීමේ දී බංග්ලාදේශය වෙනුවෙන් අරිෆුර් රහමාන් ලකුණු 18ක් තුල කඩුලු 2ක් දවා ගැනීමට සමත් විය.

ලකුණු 189ක ඉලක්කයක් හඹා යාමේ බලාපොරොත්තු සහිතව පිටියට පැමිණි බංග්ලාදේශ මුල්පෙළ පිතිකරුවන් එම ඉලක්කය සාර්ථකව හඹා යාමට අවශ්‍ය මූලික අඩිතාලම නිවැරදිව සකස් කළේය.

එහි දී පන්දු 21ක් තුල ලකුණු 32ක් ලබාගත් ජාසිම් උඩ්ඩින් සිය පෞද්ගලික ලකුණු ගිණුමට 4 පහර 4ක් හා එක් 6 පහරක් අන්තර්ගත කරන ලදි.

ඔහුට අනගි සහයක් දුන් නහිදුල් ඉස්ලාම් ලකුණු 24ක් ලබා ගත්තේ, එක් 4 පහරක් හා එක් 6 පහරක් සීමාවෙන් එපිටට යවමිනි. ඔවුන් දෙදෙනාම දැවී ගිය පසුව පිටියට පැමිණි බංග්ලාදේශ මැදපෙළ පිතිකරුවන්ව හොඳින් පාලනය කිරීමට අමිල අපෝන්සු හා චාමික කරුණාරත්න සමත් වූයේ, ශ්‍රී ලංකා කණ්ඩායම දෙසට තරගයේ වැඩි වාසිය හරවා දෙමිනි.

අවසානයේ සිය නියමිත පන්දුවාර 20 තුල බංග්ලාදේශ කණ්ඩායමට ලබා ගැනීමට හැකිවූයේ ලකුණු 141ක් පමණි. පන්දු යැවීමේ දී දඟපන්දු යවන ක්‍රීඩක අමිල අපෝන්සු ලකුණු 13ක් කුල කඩුලු 3ක් දවා ගැනීමට සමත් වෙද්දී, චාමික කරුණාරත්න කඩුලු 2ක් දවා ගනිමින් අමිල හට සහය විය.

ශ්‍රී ලංකාව – 188/7 (20): ජනිත් ලියනගේ 40, චාමික කරුණාරත්න 28*,කේ. ජයවික්‍රම 18*, හශාන් දුමිඳු 17, අරිෆුර් රහමාන් 2/18, අන්ජුම් අහමඩ් 2/28.
බංග්ලාදේශය – 141/7 (20): ජසිම් උඩ්ඩින් 32, නහිදුල් ඉස්ලාම් 24, අන්ජුම් අහමඩ් 23*, අමිල අපෝන්සු 3/13, චාමික කරැණාරත්න 2/26.

තරගයේ වීරයා – ජනිත ලියනගේ (ශ්‍රී ලංකාව – BMS)

දික්වැල්ල ,වනිදු හා අපොන්සු කණ්ඩායමට.. ගියවර ශූරයන් වු ශ‍්‍රී ලංකාවට මෙවර කිරුල රැකගැනීමට හැකිවේද?

-Thepapare.com